बैतडीको प्रसिद्ध त्रिपुरासुन्दरी भगवतीको जात्रा मंसिर ५ र ६ गते हुने

बैतडी:

बैतडीकाे प्रसिद्ध त्रिपुरासुन्दरी भगवती मन्दिरको जात्रा यही मंसिर ५ र ६ गते हुने भएको छ ।

हरेक बर्ष कार्तिक शुक्ल पक्षको अष्टमी र नवमी तिथीमा सो मन्दिरमा जात्रा लाग्ने गरेको छ । कार्तिक कृष्ण औंसीको ८ दिनपछि त्रिपुरासुन्दरी भगवती मन्दिरमा जात्रा हुने स्थानीय गणेशसिंह थापाले बताए ।

अष्टमीको दिन नानी जात र नवमीको दिन ठूली जात भन्ने चलन रही आएको थापाले बताए । अष्टमीका दिन नजिकै रहेको भण्डार घरबाट भण्डार ल्याएर जात्राको शुरुवात गरिने उनले बताए ।

त्रिपुरासुन्दरीको जात्रामा नेपालका मात्रै नभएर सीमावर्ती भारतीय दर्शनार्थीहरुको सहभागिता रहने गर्दछ । त्रिपुरासुन्दरीको दर्शनका लागि भारतको झुलाघाट, पिथौरागढ, नैनीताल लगायतका क्षेत्रबाट भक्तजनहरु आउने क्रम शुरु भइसकेको स्थानीय आनन्दमणी भट्टले बताए । यो जात्रामा राँगाको बलि दिने गरिएको छ ।

कार्तिक शुक्ल अष्टमीका दिन जात्रा शुरु भएपछि नवमीको बिहान कापडीगाउँमा भगवतीको सवारी गराउने चलन रही आएको भट्टले बताए । भैलो गाउँदै कापडीगाउँमा भगवतीको सवारी गराउने चलन रहेको छ । कापडीगाउँलाई त्रिपुरासुन्दरीको माइतीगाउँको रुपमा लिने गरिएको छ ।

Leave A Reply

Your email address will not be published.