डोटी : डोटीमा गत बैशाखको सुरुमा रोपिएको चैतेधान भित्र्याउन सुरु गरिएको छ । केहिदिन देखिको लगातारको वर्षा रोकिए पश्चात किसान चैते धान काट्न ब्यस्त भएका छन । डोटीमा यान्त्रिक प्रविधीबाट पहिलोपटक चैते धान रोपाइँ सुरु गरिएको थियो ।
विज्ञान र प्रविधिको प्रयोग गरी कृषिको उत्पादन बढाउने र लागत घटाउने उदेश्यका साथ डोटिमा पहिलोपटक यान्त्रिक प्रविधिद्वारा चैतमा धानको रोपाई गरिएको हो। डोटीको शिखर नगरपालिका संगै दिपायल सिलगढी नगरपालिकाका केही क्षेत्रमा चैते धान पहिलोपटक लगाइएको थियो ।
कृषि ज्ञान केन्द्र डोटीको आयोजना, शिखर नगरपलिकाको सहजीकरण तथा धान सुपरजोन कंचनपुर र आर सी टि इन्जिनियरिंग वर्कशप झलारी कंचनपुरको प्राविधिक सहयोगमा पहिलो पटक डोटीमा चैते धान रोपाइमा मेसिनको प्रयोग परिक्षण तथा प्रदर्शन कार्यक्रम गत चैतमा गरिएको थियो ।
डोटीको शिखर नगरपालिका २ कालागाडमा यन्त्रमा आधुनिक तरिकाले राखिएको चैते धानको बिउलाइ एक कार्यक्रम बिच डोटीका प्रमुख जिल्ला अधिकारी गोपाल प्रशाद अर्याल र जिल्ला समन्वय समिति डोटिका प्रमुख लक्ष्मण बहादुर सिंह,कृषि ज्ञान केन्द्र डोटीका प्रमुख गंगादत्त अवस्थी लगाएतले पहिलोपटक आधुनिक यन्त्रबाट चैते धानको रोपाई उद्वघाटन गरेका थिए ।
डोटीमा पहिलो पटक चैते धान प्रवर्धन कार्यक्रम मार्फत गरिएको उक्त धान खेतीबाट सोचे भन्दा धेरै राम्रो उत्पादन भएको कृषि ज्ञान केन्द्र डोटीका प्रमुख अवस्थीले बताए । उनले पहिलोपटक परिक्षण स्वरुप गरिएको चैते धान खेति बाट राम्रो प्रतिफल अएकाले आउँदा बर्ष यो कार्यक्रम डोटीका अन्य क्षेत्रमा समेत बिस्तार गरिने योजना रहेको बताए ।
पहिलोपटक गरिएको चैते धान खेति बाट दोब्बर बढी सम्म उत्पादन भएको साथै धान काटे लगत्तै अर्कोपटक समेत धान रोप्न सकिने भएकोले चैते धान खेती धेरै राम्रो लागेको किसानहरुले बताएका छन।
